Brigada News August 22

Mga Muslim gidid-an mag-sex sa buntag


HUGTANONG gidili alang sa mga magtiayong Muslim ang makighilawas sa buntag taliwala niining pag-obserbar karon sa balaang bulan nga ‘Ramadan.’
Kini matod pa ang usa sa mga ehemplo nga angay sundon isip sumusunod ni Propeta Mohamad.
Sa gihimong pakighinabi sa Brigada News ngadto ni Atty. Ombra Gandamra, ang regional director sa Office of Muslim Affairs (OMA) sa rehiyon 10 siya niingon nga kinahanglang magpakita og maayong pamatasan ang mga Muslim sa ilang pag-obserbar sa Ramadan.
Matod niya, wala gitugotan sa ilang propeta Mohamad ang makighilawas sa buntag, apan mahimo kining himoon sa magtiayon sa gabii.
“Kanang sex gi-halal kana sa Diyos alang sa mga minyo ug mahimong disiplinahon usab ang kaugalingon,” pamahayag niini.
Gani gitino ni Gandamra nga wala gayud exempted sa sama niyang Muslim sa pag-obserbar sa Ramadan, gawas lamang niadtong dunay mga gihambin nga balatian sa mga katigulangan og mga bata nga dili pa makasugakod sa pag ¬fasting kon puasa.
“Ang fasting is training to ourselves,” matod pa niya. Subay niini iyang gi-aghat ang mga kabatan-onang Muslim nga kong mahimo magpuasa gayud kay tungod niini mapugngan ang unudnong kalipay.
Dugang asoy sa opisyal nga posibleng sa petsa 29 o 30 ning bulana mahoman ang ilang Ramadan.
Sa maong adlaw gilaoman usab nga ideklarar sa kagamhanan ang special non-working holiday alang sa mga Muslim sa pagsaulog sa Eid ul-Fitr o Hari Raya Puasa. Fred Dellava




Junk shop owners gipahimangnoan

GIPASIDAN-AN sa kapolisan ang mga nanag-iya og junk shop nga dili mopalit og kinawat nga mga butang sama sa mga metrohan sa tubig, bronse, cable wire ug uban pa.
Sa pakighinabi sa Brigada News ngadto ni Senior Inspector Norberto Zafra, deputy station commander sa police station 4 (PS4) sa Carmen ning siyudad sa Cagayan de Oro niingon nga ilang gihangyo ang mga nanag-iya og junk shop nga makig-alayon ngadto kanila.
“Ato silang giingnan nga dili paliton ang mga water meter ug manawag sa atong istasyon ugaling adunay magbaligya sa maong mga butang,” pamahayag ni Zafra.
Nasayran misiaw karon ang kinawatay og metrohan sa tubig sa area of responsibility sa Carmen ning siyudad.
Sagad sa mga nahimong biktima mao ang mga nanag-iya og pa-abangang balay ug mga establisiyementong patigayon.
Si Zafra nagdugang nga kong magmagahi gihapon ang mga nanag-iya og junk shop sa ilang hangyo mapugos gayud sila sa pagdakop aron pa-imbestigahan.
Subay niini padayon pang gipangita sa kapolisan ang grupo nga responsabli sa sunud-sunod nga pagpangawat og metrohan sa tubig ning siyudad.
“Sige pa og follow-up ang atong mga operatiba,” pamahayag ni Zafra. Fred Dellava




Bayot miisyu og P2-M ‘untol nga tseke’

GIPANGITA na karon sa mga awtoridad ang usa ka suspetsadong ‘bayot’ kinsa miggamit og pangalan sa laing tawo aron makapangilad pinaagi sa pag-isyu og untol nga tseke.
Si PO3 Johnny Agotaya, imbestigador sa police station 2 (PS2) sa Cogon nga nahinabi sa Brigada News niingon nga midangop kanila ang usa ka Erlinda Obra, 58, bulag sa bana nga taga Colambog Lapasan, ning siyudad sa Cagayan de Oro niadtong Huwebes.
Sa inisyal nga imbestigasyon gisaysay ni Obra nga giilad siya sa bayot nga giilang usa ka Benedict Lim, hingkod ang edad sa wala matinong dapit.
“Kining bayot ug ang higala ni Obra nga babaye, maghigala ug closed friend daw, mao tong gigaranturan sa iyang higala ang bayot,” sulti ni Agotaya.
Asoy pa sa biktima nga gumikan iyang higala ang nag-garantor sa suspek nga mamaylo og duha ka libo ka pesos, misugot kini nga iyang ihatag ang iyang account number sa Philippine National Bank (PNB).
“Gisaligan ni Obra ang suspek nga mag-withdraw og 2 mil sa iyang bank account, apan gihurot man pag-withdraw sa suspek ang iyang kwarta nga pondo nga 4 mil pesos,” asoy pang Agotaya.
Niadtong higayona walay kasayoran si Obra ug ang iyang nga dunay laing gika-transak ang suspek.
Tuod man, miisyu og tseke ang suspetsado nga nagkantidad og 2 milyon pesos, diin iyang gigamit ang pangalan ni Obra.
Matod pa ni Agotaya, nanawag ang PNB ngadto kang Obra ug nangutana nganong mo-isyu kini og tseke nga 2 milyon pesos nga wala ma’y sulod ang bank account niini.
Human sa hitabo, wala na higkita ang suspetsado ug nagtuo ang kapolisan nga dugay na kini niyang modus operandi. Fred Dellava




‘Press Freedom Monument’ gibuksan

PORMAL nang gibuksan ang Press Freedom Monument diin agi’g pasidungog ngadto sa mga sakop sa prensa nga gipangpatay dinhi sa Pilipinas. Ang maong bantayog, gikonsiderar nga labing-unang gitukod atubangan sa kapitolyo probinsyal sa lalawigan sa Misamis Oriental.
Mismo si Misamis Oriental Governor Oscar Moreno ug pipila ka mga kadagkoan sa sakop sa prensa sa dakbayan sa Cagayan de Oro ug kasikbit nga mga dapit ang nangulo sa pag-unveil sa maong bantayog nga ginama sa bronse.
Nasayran nagkantidad og 27 milyones pesos ang gigahim nga pondo sa kagamhanan sa kapitolyo probinsyal alang sa maong proyekto.
Gibutyag ni Vincent Jaudian, ang presidente sa Cagayan de Oro Press Club (Copc) nga ang maong bantayog dili lamang ipahinungod alang sa mga gipangpatay nga mga sakop sa prensa apan lakip na ang mga buhi nga nagpadayon pa sa ilang katilingbanong kawsa isip usa ka responsabli nga magsisibya.
Makita usab sa maong bantayog nga napatik ang mga pangalan sa mga magsisibya kinsa gipangpatay alayon sa ilang gipakiglimbasogan nga kawsa.
Gibuksan usab ang nasampit nga bantayog alayon sa ika-26 nga anibersaryo sa kamatayon ni kanhi Senador Benigno Aquino, Jr kinsa nahimo usab nga tigmantala sa iyang kapanahonan.
Atol sa pagpamulong ni Vice Gov. Norris Babiera siya niingon nga ilang gitumong ang pagbukas sa maong bantayog sa paghinumdom sa kamatayon ni Ninoy isip usa ka matod pa ka ‘Good pillar of Democracy,” 20 ka tuig na ang nakalabay human gidumalahan ang nasod sa diktadoryang Marcos. Fred Dellava




Mga mamaligya-ay sa Cogon market mireklamo

DILI tiaw ang gibating kahasol karon sa mga mamaligya-ay sa merkado publiko sa Cogon gumikan sa pagsira sa hagdanan padulong sa 2nd floor niini, kini ang reklamo nga gipadangat sa mga mamaligya-ay sa interbyu sa Brigada News bag-ohay pa lamang.
Gikabutyag nga gumikan sa maong pagsira sa dalan kini ang hinungdan sa paghinay sa ilang kinitaan gumikan kay wala namay mga mamalitay pa nga mosaka kay layo ang ilang agianan.
Nasayran nga ang nasangpit nga agianan gisirad-an gumikan sa plano nga matud pa ang atrium sa maong merkado ang kini ayuhon ug himoong tiles.
Basi sa pamahayag sa usa ka tag-iya ug stall sa nasangpit nga merkado (bansagon gitago gumikan sa hangyo) mibutyag nga ang pagsira sa maong dalan nagsugod pa sa termino ni Nena Salon ang kanhi City Economic Enterprise Department (CEED) manager.
“Karon labihan gayod ka purwesyo ang among nasinati kay dili gayod tiaw ang kahasol nga ilang gihatag kanamo nga mga mamaligya-ay dinhi sa west wing sa merkado,” pamahayag niini.
Nasayran nga hangtod karon gipasagdan lamang ang nasangpit nga dalan ug pabiling gisirad-an bisan sa hangyo sa mga mamaligya-ay nga kini gubaon sanglit nakahatag man kini ug kahasol sa mga pumapalit labi na usab kanila nga mamaligya-ay.
Gipaningkamutan nga mahinabi sa Brigada News ang mga kadagkuan sa CEED apan pakyas. Ang mga kawani sa nasangpit nga buhatan pulos usab molikay sa mga pangutana mahitungod sa maong reklamo. Rey Cabaraban




‘Gasoline girl’ gihilam sa supervisor

POSIBLING mapasakahan og kasong acts of lasciviousness ang supervisor sa usa ka gasolinahan ning siyudad sa Cagayan de Oro tungod sa pagpang-gakos ug pagpanghalok niini sa usa ka pump attendant nga babaye.
Ang mga otoridad sa police station 3 (PS3) sa Agora ning dakbayan nag-ila sa reklamante nga usa ka alyas Lanie,dalaga, hingkod ang panuigon ug mulopyo sa Barangay Puntod ning siyudad.
Subay sa report makadaghang higayon nang gihimo sa naasoy nga supervisor nga gitago lamang sa pangalang Edgar ang pagpang-gakos ug pagpang-halok nga supak matud pa sa kabubut-on sa biktima.
Sa inisyal nga imbestigasyon sa mga otoridad niadto pang Agosto 17, mga alas onse ang takna sa buntag gihimo sa suspek ang maong binuhatan ngadto sa dalaga hinungan nga nireklamo gayud kini.
Sa kasamtangan mipahigayon na og makuting imbestigasyon ang women and children protection desk (WCPD) sa Agora Police Station may kalabotan sa maong kaso. Mel B. Munsad




Dalaga nagproblema sa gugma naghikog

MISULAY paghunos sa iyang kinabuhi ang usa ka dalaga sa Barangay Bayabas ning siyudad sa Cagayan de Oro gahapon sa gabii.
Swerte pa nga nadalang buhi sa balay tambalanan sa Northern Mindanao Medical Center (NMMC) ang biktima nga giilang usa ka Ashley Alvarado Atienza, 22, dalaga sa susamang dapit.
Subay sa report nga nahipos sa Brigada News, naghikog ang biktima pinaagi sa paglaslas sa iyang walang pulso samtang anaa kini sulod sa iyang lawak mga alas 8:30 ang takna sa gabii.
Gituohan sa ginikanan nga dunay problema nga gihambin ang dalaga hinungdan nga misulay kini pagpakamatay.
Wala pa usab matino sa mga awtoridad ang giingong giproblemahan sa biktima. Apan miggula sa inisyal nga pakig-usisa nga posibleng may kalambigitan sa gugma ang nasampit nga insidente. FBD




Halapad nga ‘brown out’ gibasol sa bitin

GIBASOL ngadto sa usa ka dakong bitin ang nahitabong power interruption kon ‘brown out’ sa pipila ka bahin didto sa lalawigan sa Bukidnon.
Subay sa report, adunay gitas-ong duha ka metros ang maong bitin nga milayat sa linya sa elektrisidad hinungdan nga nakuryenti kini ug diha-diha dayon nawad-an og sugang dagitab ang maong dapit.
Igo na lamang nakuha sa mga line crew sa National Grid Corporation of the Philippines (NGCP) ang bitin nga patay tungod sa kakusog sa boltahe.
Matod pa sa NGCP, nilayat ang bitin sa primary wire sa ilang Maramag-Busco Transmission Line, duol sa structure Number 122 nga nahimutang sa Barangay San Jose sa lungsod sa Quezon.
Sa report sa dxIF-Bombo Radyo, gibutyag ni Emmanuel Abellanosa, presidente sa NGCP Mindanao Operations and Maintenance nga hayan ang maong halas ang maoy hinungdan sa short circuit nga nagbunga og halapad nga brown-out.
Hinoon, nakabalik ra usab ang kuryente sa pipila ka area sulod sa upat ka oras samtang ang ubang area nibalik sa normal human ang 24 oras.
Nasayran lakip nga naapektohan sa pagkawala sa sugang dagitabnon ang franchise area sa Buseco, Fibeco ug Busco Electric Cooperatives. FBD




Kawat og baterya misiaw

GIBANA-BANANG nagkantidad og 6 mil pesos nga baterya ang malamposong gikawat sa wala pa mailhing suspetsado gikan sa usa ka publikong dyip samtang nakaparada sa may Barangay 38, ning siyudad sa Cagayan de Oro.
Si PO3 Johnny Agutaya, imbestigador sa police station 2 (PS2) sa Cogon nga nahinabi sa Brigada News nag-ila sa biktima nga mao si Winefredo Balasabas, 48, minyo sa Colambog Lapasan, ning siyudad.
Miggula sa inisyal nga imbestigasyon ni Agutaya nga giparada sa biktima ang iyang dyip nga dunay plaka KVK sa maong dapit mga alas 10:00 ang takna sa buntag.
Nakurat na lamang ang biktima dihang iyang nadiskubrehan nga nahanaw na ang duha ka mga baterya sa iyang sakyanan.
Sa pagkakaron padayon pang giila sa kapolisan ang responsabli sa krimen.
“Sa among tan-aw murag mga menor de edad gihapon ang nangawat niini,” panapos ni Agutaya. FBD




Manny molansar gayud sa 2010

GENERAL SANTOS CITY- HUGOT gipanghimakak ni Manny Pacquiao ang migawas nga report nga dili siya mopapili sa 2010 elections.
Matud kang Manny nga dili tinuod ang maong report ug wala matud pa siya gapadikta sa mga plano niini sa pulitika.
Giangkon usab sa People's champ nga daghan ang nagkumbinsi kaniya nga dili na lamang idayon ang pagpapili apan alang kaniya dayun ang iyang pagpapili.
Nasayran matud pa niini nga adunay party list group nga 1-Pacman apan dili matud pa siya ang mulingkod niini ugaling modaog ang maong grupo.
Nahauna niini gikabutyag nga usa sa mihangyo kang pound-for-pound king mao si Deputy National Security Adviser Luis Chavit Singson nga dili na kini mopadayon sa planong pagpapili sa eleksyon. Joe Reyes




Pagbusikad sa Cotabato, gisuta pa

COTABATO CITY- NAGLUSAD na og hugot nga imbestigasyon ang kapulisan sa Carmen Municipal Police Station kalabot sa nahitabong pagbusikad sa Sitio Lanitap, Brgy. General Luna, Carmen, Cotabato alas dos sa kaadlawon sa miaging adlaw.
Matud pa ni Police Inspector Winston Seniel, Officer in Charge sa Carmen Municipal Police Station nga ang pagbusikad sa granada nagresulta sa kamatayun sa usa ka 26-anyos nga residente sa Sitio Tabulon, nga nailhang si Karkay Minanga kapin sa 25 ang samdan nga gidala sa Kabacan Hospital alang sa pagtambal.
Hinuon gikabalak-ang muusbaw ang makabsan sa kinabuhi tungod adunay pipila nga grabe ang samad.
Nasayran nga nangandam alang sa kasal ang mga biktima dihang nahitabo ang pagbusikad sa granada.
Gihugtan na ang seguridad sa lugar human nagmando si Police Regional Office 12 Director Police Chief Supt. Josefino Cataluña alang sa dugang presensya sa kapulisan ug pagpahigayon og information dissemination alang sa public safety measures.
Giawhag usab ang katawhan nga magbinantayon batok sa mga pagpanghasi sa dautang elemento.
“As of this press time, the PNP will continue investigating before making a final statement or before any conclusion can be made,” matud pa ni PCSupt. Cataluña. Joe Reyes




'MILF anaa sa defensive position sa Ramadan'- Jaafar


MAGPABILIN nga anaa sa defensive position ang tropa sa Moro Islamic Liberation Front (MILF) karong bulan sa Ramadan.
Kini ang gipamahayag ni MILF Vice Chairman for Political Affairs Ghadzali Jaafar nga dili maglusad og unsa mang pagpang-atake ang ilang grupo apan mapugos sa pagbalos kong sila ang pagaunhan.
Subling gihingusgan niini nga ilang girespeto ang direktiba sa gobyerno alang sa Suspension of Military Operation (SOMO) hinungdan nga gibaslan usab nila sa pagpatuman og Suspension of Military Action (SOMA).
Kalabot niini giawhag ni Jaafar ang mga Muslim nga magpuasa alayon sa tinuuhan sa Islam sulod sa usaka bulan. Joe Reyes




Lalaki giluthang samtang nag-inom

USA ka molupyo sa dakbayan sa Cagayan de Oro ang gipusil sa wala mailhing suspetsado didto sa siyudad sa Pagadian Lunes sa gabii samtang nakig-inuman ang biktima sa iyang mga higala.
Mga otoridad sa Pagadian nag-ila sa biktima nga usa ka Christopher Tubongbanua, hingkod ang panuigon, lumad sa Barangay Balubal sa siyudad sa Cagayan de Oro ug kasamtangan lamang nga nanimuyo sa siyudad sa Pagadian.
Sa nahipos nga report sa Brigada News ang biktima gidala sa local nga ospital sa Cagayan de Oro tungod sa nahi-aguman niining usa ka samad pinusilan sa dughan ug milapos sa iyang likod.
Ang mga kauban sa biktima sa inom blangko usab ug wala masayod kung kinsa ang mipusil sa biktima gumikan nakugang na lamang sila dihang nakadungog og buto sa pusil ug nakitang nagkadugo na ang biktima mga alas 8:30 sa gabii, Agosto 17.
Matud sa report padayon pang gi-imbestigahan sa mga otoridad ang maong hitabo. Mel B. Munsad




Pag-umangkon natripan sa uyoan, gidunggab

DUHA ka samad ang nahi-aguman sa usa ka menor de edad nga lalaki human matud pa gi-unay pagluba sa iyang uyoan kinsa lango sa makahubog nga ilimnon Huwebes sa gabii sa merkado sa Agora ning siyudad sa Cagayan de Oro.
Biktima kinsa adunay usa ka samad dinunggaban sa likod ug usa usab sa abaga ang giila sa mga otoridad nga usa ka Jason Antigbao, 17 anyos, ulitawo ug mulopyo sa St. John, Barangay Puntod ning siyudad.
Sa inisyal nga imbestigasyon sa mga otoridad nasayran nahitabo ang pagpanunggab pasado alas onse sa gabii niadtong Agosto 20 diin gituohang natripan lamang ang biktima sa iyang uyoan ug gidunggab kini gamit ang mahait nga kotselyo.
Human matud pa sa hitabo daling misibat ang suspek ug sa kasamtangan padayon pa kining gipangita sa mga otoridad aron ma-imbestigahan. Mel B. Munsad




48 anyos minyo gitigbas

PADAYON pang gipangita sa mga otoridad sa Manolo Fortich, Bukidnon ang suspetsado nga mitigbas sa 48 anyos nga lalaki niadtong Miyerkules sa hapon.
Nasayran nga usa ka Alkin Umpay, minyo ug mulopyo sa nahisgutang lungsod ang gitigbas untop alas singko sa hapon niadtong Agosto 19 samtang pauli na unta ang biktima sa iyang pinuy-anan.
Sa followup nga imbestigasyon sa mga otoridad sa Manolo Fortich Municipal Police Station naila ang suspek sa pangalang Andy Anda-ol, hingkod ang panuigon ug mulopyo sa susamang lungsod.
Sumala sa report ang biktima nakahi-agom og usa ka samad tinigbasan sa iyang ulo, agtang ug bukton hinungdan nga gidali kini og dala sa ospital sa dakbayan sa Cagayan de Oro.
Hinuon gikabutyag nga luwas na kini sa makuyaw nga kahimtang ug padayon na lamang kining nagpaalim sa iyang samad. Mel B. Munsad




Peace forum pangontra sa kagubot - MNLF

GIPAKUSGAN pa karon ni Moro National Liberation Front (MNLF) General Rodrigo Daud Fabillon, ang commanding general sa Mindanao, Sulu ug Palawan (MINSUPALA) ang pagpahigayon og peace forum ngadto sa iyang mga ginsakpan.
Matud ni Fabillon nga kini lamang ang maoy nahunahunaan aron nga dili na modako ang kagubot susama sa nahitabo didto sa Palawan kong asa nakaengkwentro sa grupo ni MNLF commander Abdullah Abdurajak ang tropa sa gobyerno hinungdan nga namatay apil ang laing unom pa ka mga MNLF members.
Nagtoo si Fabillon nga pinaagi sa nasangpit nga peace forum masabtan sa mga miyembro sa MNLF ang importansiya sa kalinaw sa Mindanao ug ang padayong pagtuman sa gipirmahang peace agreement tali sa MNLF ug gobyerno niadtong 1996.
Samtang dili kumbinsido si Fabillon nga tawagong breakaway group sa MNLF ang grupo ni Abdurajak tungod nagtoo kini nga ang nahitabong engkwentro sa Palawan ang usa lamang ka mis-encounter. Joe Reyes

Brigada News August 19

9-anyos gilugos bugti sa piso

GUMIKAN lamang kuno sa sinsiyo nga piso, napugos matod pa ang usa ka 9-anyos nga babaye nga mapanamastamasan siya sa iyang silingan sa Barangay Agusan ning siyudad sa Cagayan de Oro.

Giingong adunay daut sa pangutok ang biktima kinsa gitago lamang ang ngan nga usa ka Cristine, 9, menor de edad sa susamang dapit.

Sa gihimong pakighinabi sa Brigada News ngadto ni PO2 Noel Perpetua, imbestigador sa police station 6 (PS6) sa Puerto ning siyudad nag-ula sa suspek nga mao si Dante Nanganlag, alyas Bodoy, hingkod ang edad, ulitawo sa susamang dapit.

Si Perpetua niingon nga atol sa iyang gihimong pasi-unang pakig-usisa sa biktima gi-asoy niini nga gihatagan kuno siya og piso sa suspetsado niadtong higayona.

“Gipasabak matod pa ang biktima samtang naglingkod kining suspek,” pamahayag ni Perpetua.

Aduna matod pay nakakita nga silingan nga gipasabak sa suspek ang bata sa iyang sabakan.

“Kining bataa man gud dihang akong gikahinabi murag dunay daut sa pangutok, maglisod pud og istorya, pero iyang giingong nga sakit kuno ang iyang bilahan,” si Perpetua nag-asoy sa Brigada News.

Matod pa sa pamahayag sa biktima nga mga alas 10:30 ang takna niadtong Lunes sa gabii gisugo siya sa iyang amahan nga magpalit og suka.

Tuod man tungod kay mangiob ang nasampit nga dapit ug wala matod pay sugang dagitab, giharangan kuno sa suspek ang bata ug iyang gipasabak.

“Nasapon kining suspek dihang gipasigahan og flash light sa iyang silingan nga nagbaklay, ug kalit kunong gisiradhan ang iyang zipper,” matod pang Perpertua.

Gituohan nga gipugos sa suspek nga ipasulod ang iyang kinatawo ngadto sa kinatawo usab sa biktima gumikan nagping-it matod pa sa kasakit ang bata dihang nisaysay sa iyang inahan.

“Amo gilayon girespondihan ang dapit nga gisulti kanato sa inahan apan wala na didto ang suspek, kalit lamang kunong mikagiw,” dugang asoy ni Perpertua.

Sa pagkakaron gihulat na lamang sa kapolisan ang resulta sa pag-eksamina sa kinatawo sa biktima kong positibo ba kining nahilabtan sa suspetsado.

Dugtong pa niini nga desidido gayud ang ginikanan sa bata nga mopasang-at og kaso batok sa suspetsado. Fred Dellava

Militar wa gitraydor- Kabalu

GIPAMUGOS ni Atty. Eid Kabalu, ang tigpamaba sa Moro Islamic Liberation Front (MILF) nga wala nila gitraydor ang grupo sa mga kasundalohan nga milusob didto sa Tipo-Tipo, Basilan sa niaging semana.

Si Kabalu atol sa pakighinabi sa dxIF-Bombo Radyo niingon nga walay kamatuoran ang mga gipasangil ngadto kanila sa Armadong Kusog sa Pilipinas.

“Yung concept nila [AFP] ay napaka-unacceptable,” pamahayag ni Kabalu.

Kahibaloan nagbinasolay ang militar ug MILF kabahin sa nahitabong gubat batok sa Abu Sayyaf sa Basilan diin ubay-ubay ang nakabsan sa kinabuhi.

Nasayran una nang gihingusgan ni Western Mindanao Command (Wesmincom) chief Maj. Gen. Ben Dolorfino, nga sa wala pa mahitabo ang engkwentro, nasayod matod pa ang MILF leadership sa presensya sa militar sa Tipo-tipo, hayan gikinahanglan unta nilang mo-atras niadtong higayona.

Midepensa usab si Kabalu sa pagkanayon nga igo lamang nagbalos ang ilang puwersa sa gihimong pagpabuto sa mga sundalo.

“Pinapalabas nila na they were ambush…hindi tama yon, ang concept na yan ay product ng dirty propaganda,” pamahayag ni Kabalu.

Giangkon ni Kabalu nga adunay kampo ang militarya sa Tipo-Tipo, hayan kinahanglan matod pa sa mga sundalo nga makig-alayon ngadto sa ilang kumander ugaling adunay pagahimoong operasyon batok sa mga rebelde.

“Pinagtatanung ko nga sinong pinagsasabihan nila bat pumasok sila sa area,” matod pang Kabalu.

Dugang niya, “Yung una kasing target nila yung ASG, ang involve dito ay scout ranger, kaya nagkaroon noon ng battalion sight.” Fred Dellava

Presensya sa NPA sa Kagay-an Fest gibantayan

GIPASALIG karon sa armadong kusog sa Pilipinas nga dili malutsan sa mga rebeldeng New Peoples Army (NPA) ang kasaulogan sa Kagay-an Festival sa dakbayan sa Cagayan de Oro.

Gibutyag ni Major Michelle Anayron, Jr., ang tigpamaba sa 4^th Infantry (Diamond) Division, Philippine Army nga ilang gibantayan pag-ayo ang sagad gihimo sa mga rebelde sama sa pagpanulis ug pagpanunog sa mga vital installations.

“Murag hinay-hinay nasab nila [rebelde] gisunod ang lihok sa Abu Sayyaf,” si Anayron nagkanayon sa pakighinabi sa dxIF-Bombo Radyo.

Gipunting sa opisyal ang teroristang hinimoan sa nasampit nga grupo sama na lamang sa kidnapping nga dunay dakong ransom.

“Continues ang among combat operation hangtod wala pay ideklarang ceasefire,” matod ni Anayron.

Gani gitino sa opisyal nga kun ugaling makasulod man sa siyudad ang mga rebelde, paspas nila kining marespondihan.

Kahinumdoman nanulis ug nang-hostage ang gibana-banang 20 ka mga rebeldeng New Peoples Army (NPA) sa usa ka fast food chain didto sa lungsod sa Quezon, Bukidnon Lunes sa buntag.

Gibutyag ni Anayron nga sakop sa front committee 6 sa NPA ang giingong mga responsabli.

Si Anayron niingon nagpadayon pa ang gilusad nga pursuit operation sa 29^th IB batok sa suspetsado. Fred Dellava

Daghan pa ang wa kadawat og calamity funds - Ocon

UBAY-UBAY pa ang wala makadawat sa calamity fund sa nahitabong halapad nga pagbaha sa dakbayan sa Cagayan de Oro niadtong Enero 11 ning tuiga.

Si Konsehal Zaldy Ocon atol sa iyang special report sa ika-107 nga regular sesyon sa konseho niingon nga kapin usa ka gatus pa ka mga pamilya ang wala mahatagan og tabang-pinansyal sa kagamhanang lokal.

“Kong imong sutaon almost 100 pa ka mga pamilya ang wala gayud makatilaw sa calamity funds hangtod karon,” si Ocon nagkanayon.

Gani gidasig ni Ocon ang city social welfare nga himoan og igong aksyon ang mga mulo matod pa sa katawhan nga wala pa makabaton og hinabang gikan sa gobiyerno.

Si Konsehal Dante Pajo, committee chair sa heath and social services nagkanayon nga sayop usab sa ubang mga apektadong residente nga wala midangop sa ilang tag-tagsa ka barangay aron magpalista. Gi-asoy niini nga aduna usab uban nga nisakay sa panahon.

“Tinuod kana nga duna pay wala nahatagan kay wala man sab sila nag-coordinate sa barangay,” matod ni Pajo.

Gitino niini nga ila gayud gi-istriktohan ang paglista sa mga pangalan sa nabiktima sa maong kalamidad aron ma-igo ang gigahin nga pondo gumikan adunay pipila nga buot lamang mosakay sa panahon. Fred Dellava

Tinun-an nalumos sa suba

NAWAD-AN sa iyang panimuot ang usa ka tinun-an dihang napalgan kini sa hiniusang pwersa sa Oro Alert ug Rescue 2000 human gikataho nga nalumos samtang naglulinghayaw sa suba sa Biasong Macasandig ning siyudad sa Cagayan de Oro gahapon sa hapon.

Sa pakighinabi sa Brigada News ngadto ni Mayeth Plaza sa Comcenter 166 ning siyudad niingon nga mga ala 1:50 ang takna sa hapon gitaho kanila sa nagpakabanang residente ang maong insidente.

Si Plaza niingon nga diha-diha dayon nilang gitawagan ang Oro Alert ug Rescue 2000 aron sa pagluwas sa biktima.

Tuod man napalgan ang biktima mga alas 3:00 ang takna sa hapon ug giila kining usa ka Eden Jane Naguita, 13, usa ka tinun-an nga taga Barangay 35 ning siyudad.

Matod pa ni Plaza, nga subay sa report, nagtungha ang biktima sa City High School ug kasamtangan kining anaa sa second year level.

Dihang napalgan sa mga awtoridad ang biktima giluwas gilayon kini pinaagi sa pag-apply og first aide. Fred Dellava

Illegal gambling drive gihugtan

NAGPADAYON karon ang kampanya sa kapolisan batok sa iligal nga sugal ning siyudad sa Cagayan de Oro.

Apan si Konsehal Ian Mark Nacaya sa pakighinabi sa Brigada News niingon nga dili tanang sugal makonsiderang iligal ug kinahanglang puhagon.

“Adunay mga sugal sama sa Binggo ug uban pa nga gi-authorize sa gobiyerno kon Pagcor,” matod niya.

Subay niini gipasalig usab sa opisyal nga iyang hisgotan sa komitiba sa police, fire and public safety sa konseho ang nahitabong pag-ronda sa kapolisan sa balay sa kanhi gubernador sa lalawigan sa Misamis Oriental niadtong Dominggo sa gabii.

Si Nacaya niingon andam nilang pahugtan ang kampanya batok sa iligal nga sugal kauban usab ang mga opisyales sa nagkadaiyang barangay ning siyudad.

“Kong mahimo atong ipatuman gyud ang two strike policy,” si Nacaya nagdugang.

Angayan matod pa nga manubag sa balaod ang kinsa mang masikop nga nalambigit sa iligal nga sugal, sama sa nahitabong pagpang-ronda sa kapolisan ngadto sa balay ni Kanhi Gov. Antonio Calingin.

Nasayran nga lakip ang anak sa kanhi gubernador sa lalawigan ang gidakop sa mga elemento sa City Investigation and Detective Management Branch (CIDMB) sa Cagayan de Oro City Police Office (Cocpo).

Gawas kang Andy Calingin gipangsikop usab ang 20 ka tawo nga anaa sulod sa ilang balay nga nagsugal og poker kon baraha.

Si Acting Police Director PSSupt. Noel Armilla sa Cocpo nga nahinabi sa Brigada News nagkanayon nga ila pang gihugtan karon ang anti illegal gambling drive.

Mi-apela ang opisyal ngadto sa publiko nga motaho sa kapolisan ugaling aduna silay masayran nga mga tawo o ilang silingan nga nalambigit sa iligal nga sugal. FBD

Anak gilubot pagdunggab

GISAMPOT pagdunggab sa suspetsadong amahan ang kaugalingon niyang anak human wala magkasinabot sa Gaerlan St., Barangay Uno ning siyudad sa Cagayan de Oro.

Sumala sa report, nakaangkon og samad dinunggaban sa walang dapidapi ang biktima nga giilang usa ka Glenn Soldia, 30, ulitawo sa susamang dapit.

Butyag pa ni PO2 Chaplin Selaras sa police station 1 (PS1) sa Divisoria ning siyudad nga nahinabi sa Brigada News nga pasado alas dose ang takna sa hapon nagpatabang kanila ang biktima.

Sa inisyal nga imbestigasyon sa kapolisan, gi-alegar sa biktima ang iyang amahan nga giilang usa ka si Rudy Soldia, hingkod ang edad, nga maoy midunggab kaniya.

Gisaysay sa polis nga hilabihan matod pa ang kasuko sa amahan ngadto sa iyang anak hinungdan nahitabo ang pagpanunggab.

Padayon pa usab gisuhid sa kapolisan ang motibo sa nasampit nga insidente. Mel B. Munsad

Patay gilabay sa kanal

USA ka patayng lawas sa lalaki ang napalgan sa nga naglutaw-lutaw sa kanal didto sa Purok 3, Brgy. Upper Doongan, siyudad sa Butuan.

Sumala sa report, nakaplagan ang patayng lawas niadtong Dominggo sa hapon.

Gituohang nag-bisikleta ang biktima niadtong higayona tungod adunay nakit-ang gamay nga biseklita pipila ka metros ang gilay-on sa crime scene.

Sa imbestigasyon sa kapolisan adunay nakit-ang pitaka nga dunay sulod nga usa ka dolyar, 20 pesos ug mga sinsilyo.

Aduna usab Identification card (ID) nga gipanag-iyahan sa usa ka Conrado Bersano sa Purok 1-A, Brgy. Holy Redeemer ning siyudad.

Ang biktimang gibana-banang nagbarog og lima ka tiil nga gitas-on, nagsuot og kolor puti nga t-short nga duna’y kolor blue nga rebete sa bukton og dark blue nga karsones.

Padayon pang giimbestigahan sa kapolisan kung unsa ang hinungdan sa kamatayon sa biktima kinsa una nang gitu-uhang nalumos sa kanal human mahulog tungod sa kahubog. FBD

Gun amnesty program nagpadayon

GIPANG-APOD na sa Firearms and Explosives Security Agencies and Guards Protection Section o FESAGS ang mga application form alang sa pagparenew ug sa pagparehistro sa mga armas alayon sa gun amnesty program.

Matud pa ni Police Supt. Arpa Makalamkom sa FESAGS nga miabot na ang application forms ug gipang-apod apod ngadto sa mga city, provincial ug municipal police office.

Sa unrenewd firearms, dili na kinahanglang ipresenta ang armas samtang sa mga unregistered, kinahanglang dad-on ang armas alang ballistic.

Matud pa ni Makalamkom nga sa miaging adlaw lamang kapin sa napulo ang nagparenew ug tulo ang nagparehistro.

Dili mahimong iparehisto okuhaan og lisensya ang mga paltik nga mga armas.

Tumong sa maong gun amnesty nga ma-account ang tanang armas sa nasud. Joe Reyes

Pacman isip peace negotiator wa gi-uyunan

GIHINGUSGAN karon ni Moro Islamic Liberation Front (MILF ) Vice Chairman for Political Affairs Ghadzali Jaffar nga usa ka non-sense ang sogyot ni Senator Aquilino Pimentel nga himuong peace negotiator si People's Champ Manny Pacquiao aron maundang na ang kagubot sa Mindanao.

Gibutyag ni Jaafar sa Bombo Radyo nga girespeto nila ang Pambansang Kamao tungod sa abilidad niini sa boksing apan gitino niini nga ang giyera nga gihisgutan sa Mindanao ang dili matud pa dulang boksing.

Gidugang pa ni Jaafar nga makab-ot lamang ang kalinaw sa Mindanao pinaagi sa panag-istoryahay tali sa gobeyrno sa Pilipinas ug MILF sa negotiating table.

Gibutyag usab ni Jaafar nga dili angayang saligan sa gobyerno nga gilayong makab-ot ang kalinaw sa Mindanao sa tabang ni Pacquiao isip Ambassador of Peace.

Nasayran nga nagpadayag si Pacquiao nga andam kini sa tanang higayon nga magpatunga aron lamang maangkon sa mga Mindanaoans ang kalinaw. Joe Reyes

Granada napalgan

KORONADAL CITY- Gilayong gipahugtan sa kapulisan ang seguridad sa Banga, South Cotabato human makaplagan ang usa ka fragmentation grenade atubangan sa usa ka rice mill sa nasangpit nga lungsod.

Gibutyag sa Banga Police Station nga gibilin matud pa sa wala mailhing mga suspek ang granada sa atubangan sa nasangpit nga establismento nga gikahadlok usab sa mga residente sa maong dapit.

Maayo na lamang kay daling gireport sa nakakita sa granada ang insedente sa kapulisan ug natipigan sa husto ug wala nakamugna og kadaut.

Sa pagkakaron gisuta pa sa mga otoridad kong unsang matang sa granada ang nakaplagan ug kong kinsa ang mibilin niini sa nasampit nga dapit. Joe Reyes

1,490 ka mga kliyente naserbisyohan sa city library

MOKABAT sa 1,490 ka mga researcher, estudyante ug magbabasa ang naserbisyohan sa City Public Library sulod sa bulan sa Hulyo ning tuig, matud pa ni City Public Librarian Lorna C. Regalado sa iyang taho nga giduso ngadto kang City Mayor Constantino G. Jaraula.

Sa kasamtangan, adunay 15,937 ka koleksyon sa nagkalain-laing mga libro ug 3,211 ka serial books ang magamit karon sa City Public Library.

Naglaum si Regalado nga pinaagi sa ilang mga koleksyon, ubay-ubay pang mga estudyante ug researcher ang makapahimulos niini, nunot ang pagdapit niadtong gusto mamahimong miyembro pinaagi sa pagbayad og P30 nga annual membership fee. CIO

Tinun-an gi-gang rape

PADAYON pang gisuhid sa kapolisan didto sa lungsod sa Tagoloan, Misamis Oriental ang alegasyon sa usa ka 9-anyos nga babaye kinsa giingong gigang-rape sa duha ka mga suspetsado.

Sumala sa report gikan sa Tagoloan Municipal Police Station, miggula nga niadto pang Agosto 6 ning tuiga gihimo sa mga suspetsado ang pagpanamastamas sa pagkababaye sa biktima nga giilang usa ka Mirasol, 9, (tinuod nga ngan gipugngan).

Gibutyag sa mga awtoridad nga nagtungha sa elementarya ang biktima sa nasampit nga dapit.

Una niini, dako ang pagtuo sa inahan sa biktima nga napusgay gayud ang pagka-babaye sa iyang anak tungod ning ulahing mga adlaw iyang nakit-an si Mirasol nga nagtakiang na kon maglakaw ug dunay gibating kasakit sa iyang kinatawo.

Tuod man nahuna-hunaan sa inahan nga pangutan-on ang iyang anak, hangtod nakatug-an gayud ang bata sa gihimo kaniya sa duha matod pa ka mga lalaki.

Gani gipahimangnoan na lamang sa kapolisan ang inahan nga ipasuta sa sa mga doktor ang bilahan sa iyang anak aron masuta kon adunay laceration.

Gi-asoy usab sa inahan nga kon mapamatud-an nga tinuod nga nahilabtan ang iyang anak sa duha ka mga lalaki, dili kuno sila magpanuko sa pagsang-at og kasong lugos. Mel B. Munsad

Diyandi Festival 2009 dumalahon sa namugnang executive management committee

ILIGAN CITY- Na-resolbar na sa mga sakop sa Sangguniang Panlungsod ang isyu kalabot sa grupo nga mao’y tugyanang modumala sa Diyandi Festival sa Iligan ning tuiga.

Pabor ang konseho nga magpadayon una ang mga nasugdang mga paglihok sa Diyandi Festival 2009-Executive Management Committee ubos sa pagpangulo ni Suarez Barangay Captain Erlito “Doods” Dalangin.

Tungod kini kay ning panahona, kinahanglan pang motudlo si Mayor Lawrence Lluch Cruz og mga personalidad nga molangkob sa foundation ug ipa-rehistro pa usab kini sa Securities and Exchange Commission (SEC).

Na-uyonan ang mosyon ni City Councilor Moises Dalisay, Jr. nga isuspende una sulod sa tulo ka bulan ang hingpit nga pagpatuman sa City Ordinance No. 09-5473, ang balaod sa siyudad nga nagmugna sa Diyandi Activities Foundation of Iligan Incorporated.

Partikular nga gisuspende ang paragraphs (a) ngadto sa (g) sa Section 3 nga mao ang naghatag katungod sa foundation nga mao na’y modawat sa mga donasyon, kontribusyon ug susama niini, pagpirma sa kontrata ug uban pa. Lakip nga gisuspende ang probisyon sa organization and operation nga nakalatid diha sa Section 4, relasyon sa Executive Committee ug foundation nga nakalatid sa Section 5 ug ang Transitory Provision diha sa Section 8.

Gitakdang matapos ang suspensiyon sa Oktobre 31 ning tuiga. Mta

Publiko, subling gipahimangno-an batok dengue

ILIGAN CITY- Mipahimangno na usab sa publiko ang mga kadagko-an sa City Health Office ug Gregorio T. Lluch Memorial Hospital kalabot sa namatikdan karong pagsaka sa mga kaso sa dengue fever dinhi sa siyudad.

Miasoy si Dr. Eustiquio Oliverio, Jr., hepe sa GTLMH, nga miabot na sa trienta (30) ka mga pasyente kinsa natakboyan sa dengue ang na-admit sa ilang tambalanan niini lamang mga panahona. Hinoon, pipila niini taga-probinsiya sa Lanao.

Aduna usa’y nadawat nga taho si Dr. Oliverio nga usa ka pasyente sa dengue fever kinsa na-admit sa usa sa mga pribadong tambalanan ang nakabsan sa kinabuhi niadtong miaging adlaw.

Gi-awhagan sa GTLMH chief ug sa CHO ang publiko sa pagmintenar sa kalimpyo sa palibot ug likayan ang pagbaton og nakapundong tubig nga posibleng ka-itlogan sa lamok aron kalikayan ang pagkaylap sa maong sakit. Boy Decena

Comcenter mitubag og 390 ka tawag

MOKABAT sa 390 ka mga tawag sa emerhensya ang natubag sa Cagayan de Oro Emergency Assistance and Communication Center (COMCENTER) sulod sa bulan sa Hulyo ning tuig, sigun sa taho ni Comcenter manager Ric E. Pabayo sa iyang binulang taho kang City Mayor Constantino G. Jaraula.

Matud ni Pabayo nga sulod sa niaging bulan, ang COMCENTER nakatubag og 3 ka tawag kalabot sa patayng lawas; 1 sa pagpanglugos; 1 sa pinusilay; 115 sa aksidente sa trapiko; 7 sa pagpanglabni; 1 sa pagpangdunggab; 2 sa druga; 8 sa alarma sa sunog; 1 sa physical injury; 1 sa rescue; 8 sa pagpangawat og sakyanan; 2 sa domestic violence.

Ang COMCENTER mitubag usab og 41 ka tawag-reklamo kalabot sa pag panghasi sa hubog; 86 ka bank alarm ug 113 ka nagkadaiyang tawag-pakitabang.

Ang COMCENTER bukas sa tanang adlaw sa semana aron pagtubag sa nagkadaiyang tawag-pakitabang gikan sa publiko. Sila matawagan sa 166 sa tanang linya sa telepono ug 14500mhz sa VHF radio. CIO

Brigada News August 12

Menor de edad nalambigit sa krimen

ANGAYANG palig-unon ug i-implementar gayud ang ordinansa mahitungod sa curfew alang sa mga menor de edad nga maglatagaw sa tungang kagab-ihon ning siyudad sa Cagayan de Oro.
Si Konsehal Ramon Tabor, chairman sa committee on laws and rules sa konseho ning siyudad niingon nga huyang gayud ang pagpatuman sa maong ordinansa sanglit nagpadayon gihapon ang paglatagaw sa ubang mga menor de edad sa kadalanan.
“Kong imong tan-awon, inig-gabii diha sa Tiano-Velez, daghan gihapong mga bata nga naglaroy-laroy kinsa ang uban kanila nalambigit sa gidiling drogas,” pamahayag ni Tabor atol sa iyang special report sa regular session gahapon.
Gani gipunting sa magbabalaod nga gikinahanalang palig-unon pa gayud sa kagamhanang lokal ang pagpatuman sa ordinansa.
“We should impose this against minor. Look into our existing ordinance on curfew [R.A. 9344],” si Tabor nagkanayon.
Matod sa opisyal sagad sa mga menor de edad nga naglaroy-laroy karon sa kadalanan ning siyudad nalambigit sa krimen sama sa pagpanglabni ug pagpanglungkab.
“Pareho anang watch your car boys, ila kunong bantayan ang imong sakyanan apan sila ra usab ang mangunay paglungkab,” dugtong niya.
Nabalaka ang nasamit nga opisyal nga posibling malambigit unya sa dagkong mga krimen ang mga menor de edad.
Tungod niini, mi-apela si Tabor sa mga ginikanan nga bantayan pag-ayo ang ilang mga anak aron dili mahitumpawak sa gidiling drogas.
“Kini man gud nga mga menor de edad, aduna ma ni silay manoy-manoy, kong madakpan na gani ila dayong ingnan ang mga awtoridad nga sila ang ginikanan,” si Tabor nagkanayon.
Matod niya kining nagsilbeng mga ‘manoy-manoy’ sa mga menor de edad ang maoy magtudlo kanila nga mohimo og krimen bugti sa gamay nga kantidad sa salapi.
“Kong madakpan ni sila dili gani ipriso ipa-safe keeping ra kay duna man magpa-ila nga ginikanan,” asoy pang Tabor.
Gi-aghat ni Tabor ang mga opisyales sa barangay nga makig-alayon kanila aron hingpit nga mapakusog ang implementasyon sa nasoyng ordinansa.
Si Association of Barangay Captain (ABC) president Aaron Neri, Sr., niingon nga dili gayud mapuo kining mga menor de edad nga mohimo og krime tungod magbalik-balik ra usab sila.
“Kong imo ni silang dakpon, pagka-ugma o sunod adlaw naa ra gihapon sila,” si Neri nagsulti.
Samtang si Konsehal Dante Pajo, committee chair sa health and social services sa konseho niingon nga aduna nay task force nga gimugna ang siyudad kalabot curfew sa mga menor de edad, apan sama pamahayag ni Neri, giangkon ni Pajo nga dili gihapon mapugngan ang paglatagaw niining mga menor de edad sa kadalanan.
Gani uyon si Pajo nga paserbisyuhon sa komunidad ang mga menor de edad nga masikop maglatagaw sa kadalanan ilabina sa kagab-ihon. Fred Dellava

NPA nga motahan madugangan pa

DAKO ANG pagtuo sa armadong kusog sa Pilipinas nga modaghan pa ang ihap sa mga rebeldeng New People’s Army (NPA) nga motahan human sa pagkasikop sa usa sa ilang giilang tag-as nga lider sa miaging semana.
Si Major Michelle Anayron, Jr., ang tigpamaba sa 4th Infantry (Diamond) Division, Philippine Army niingon nga nadugangan og tulo ang ihap sa mga nitahan nga NPA sukad niadtong Lunes.
Gani sa katibuk-an, gi-asoy ni Anayron nga mokabat na sa siyam ka mga rebelde ang ningtahan sulod lamang sa ning bulana.
Si Anayron nagkompirmar nga tulo ka mga rebelde ang niahan niadtong Lunes didto sa Malaybalay City, Bukidnon.
Dungan matod pa sa pagtahan sa mga nahisgotan ang ilang mga tag-as nga kalibre sa armas.
“Kining tulo nga nitahan sakop ni sila sa front committee 89 sa NPA,” pamahayag sa opisyal.
Masaligon ang militarya nga modaghan pa ihap sa mga rebelde nga motahan kanila gumikan nagkahuyang na usab ang ilang operasyon human masikop si Alfredo Mapano alyas Ka Pedro Pares, nga secretary general sa NPA sa Mindanao.
“That time nga nadakpan si Mapano nagtuo kami nga naay effect. Nanghinaot ta nga magpadayon kini,” si Anayron nagkanayon.
Sa dugang pa, ang AFP mipasalig usab og hinabang ngadto sa mga pamilya sa nitahan nga mga rebelde.
Asoy pang Anayron adunay gigahin nga pondo ang gobiyerno alang sa livelihood program alang sa mga rebelde nga buot mobalik sa normal ang ilang kinabuhi.
Si Anayron nagkanayon nga maka-avail og programa sa militar ang mga rebelde nga mobalik sa sabakan sa balaod. Fred Dellava

222 ka tawo sa NorMin may A(H1N1)

SUBLING nagpahimangno ang Department of Health (DOH-10) sa publiko nga maghinlo kanonay ug imintinar ang pagsunod sa mga gabayan aron malikay sa influenza A(H1N1) virus.
Si DOH-assistant regional director Dr. Jose Llacuna Jr., nagkompirmar nga misaka na ngadto sa 222 ka mga tawo ang nagpositibo sa virus sa Northern Mindanao.
Si Llacuna niingon kadaghanan kanila mga tinun-an kinsa naggikan pa sa nagkadaiyang mga tunghaan dinhi sa rehiyon.
Matod niya 15 ka mga tunghaan sa dakbayan sa Cagayan de Oro, unom sa lalawigan sa Misamis Occidental, upat sa Misamis Oriental, duha sa Bukidnon ug usa usab sa dakbayan sa Iligan.
Nasayran una nang girekomendar sa DOH ang temporaryong pagpasarado sa klase sa nag-positibo nga mga tunghaan.
Gitino usab niini nga ila nang giundang ang pagpahigayon og mga swab testing sa tawo nga posibleng naghambin sa A/H1N1 virus.
Kini subay usab sa nalatid sa DOH guideline no. 21 diin nagmando sa tanang buhatan nga pangitaon na lamang kadtong tawo nga nagbaton sa influenza like illness (ILI).
Dugang niini, giklaro sa opisyal nga dili angay mabalaka ang publiko sanglit kontrolado na ang pagkuyanap sa virus ning mga panahona. Fred Dellava

8 ka tawo gipatay sa lamok

SAMA SA kanonay nga gipahimangno sa Department of Health (DOH), mas angayng mahadlok sa sakit nga dengue fever inay sa A(H1N1) virus tungod sa daghang kaso sa casualty ang natala niini.
Gibutyag ni Dr. Ignacio Moreno, provincial health officer sa lalawigan sa Misamis Oriental atol sa pakighinabi sa dxIF-Bombo Radyo nga misaka ngadto sa walo ka mga tawo ang napaakan og makamatay nga lamok.
Matod ni Moreno ang maong ihap sa kamatay natala sukad sa buwan sa Enero hangtod Hulyo ning tuiga, samtang 198 usab ang natakboyan sa dengue hemorragic fever.
Si Moreno nagkanayon lakip sa mga lungsod nga naigo sa dengue mao ang Tagoloan diin nagtala og upat ka tawong namatay samtang tag-usa usab gikan sa Salay, Medina, Jasaan ug Gingoog City.
Subay niini padayong nagpahimangno ang DOH sa publiko nga maghinlo kanonay sa palibot aron malikayan nga matakboyan sa maong balatian. Fred Dellava

NMMC himoong special hospital

NAGKINAHANGLAN og igong panahon ang plano nga palambuon aron mahimong special hospital ang Northern Mindanao Medical Center (NMMC) ning siyudad sa Cagayan de Oro.
Si Dr. Jose Chan, NMMC chief nga nahinabi sa Brigada News niingon nga pabor siya sa maong plano, apan dili matod pa yano lamang kining ipatuman nga walay igong preparasyon og pondo.
Una niini, si Mayor Constantino Jaraula namolong atol sa pagbukas National Hospital Week ug ika-91 founding anniversary sa NMMC niadtong Lunes nga buot niyang himoong ‘Specialize Hospital’ ang NMMC.
Gipasabot ni Jaraula nga ang maong plano mao ang pag-modernisa sa NMMC aron mahatagan og igong pagtagad ang grabe nga mga balatian.
Sa pikas bahin, gipasabot ni Chan nga wala nila gidid-an ang media sa pagkuha og impormasyon sa NMMC.
Matod niya aduna lamang mga sitwasyon nga angay usab sabton sa media.
“Wala man ko nag-ingon nga atong bawalan ang media nga mokuha og impormasyon sa ospital. Magdepende kana sa sitwasyon,” asoy ni Chan.
Gani mi-apela si Chan sa media nga kong mahimo makig-alayon ngadto kanila ugaling adunay buot makuha nga impormasyon o hulagway sa mga pasyente.
Asoy ni Chan wala lamang masabtan sa kanhi nagdumala sa NMMC ang mga patakaran nga gipatuman sa maong ospital.
Kahinumdoman una nang miggula ang isyu nga gidid-an na ang media sa pagkuha og impormasyon sa nasampit nga publikong ospital tungod usab sa reklamo sa ubang mga pasyente nga nahipatik ang ilang mga ngan sa lokal nga mga mantalaan ug madungog sa radyo ug makita usab sa telebisyon. Melbert Munsad

Sulod sa gitrabahoan
Empliyada gimolestiya

MIDANGOP sa buhatan sa kapulisan sa Puerto Police Station 6 ang usa ka Ginang human gimolestiya kini sulod sa iyang gitrabahoan sa Del Monte Philippines Incorporated kon DMPI alas 6:45 ang takna sa gabii kapin ug kulang niadtong Domingo.
Ang biktima gitago lamang sa ngalan nga usa ka Wennie, 32 anyos, minyo ug molupyo sa Zone 3, Barangay Agusan ning dakbayan. Samtang ang suspek giila nga usa ka Mariano Rama, hingkod ang panuigon, minyo og molupyo sa Puerto Heights, Barangay Bugo sakop ning ning syudad.
Asoy pa sa biktima sa kapulisan nga ang nasangpit nga suspek ang mihimo sa pag-gakos ngadto kaniya og paghilam sa pribadong parte sa iyang lawas nga supak sa iyang kabubut-on.
Dugang pa ni Wennie, nga buot unta niyang isugilon sa ilang labaw ang gihimo sa suspek apan gihawiran na siya niini og gihilam ang iyang pus-on apil usab ang iyang suso hinungdan nga gibati niya ang tumang kahadlok ug kapungot ngadto sa suspek.
Misamot ang gibati sa biktima sa dihang gikaminusan pa siya ni Rama sa dihang misulti kini nga gahawid sa iyang bukton nga nagkanayon" Kon nauyab taka, paburusan kuni og kaduha".
Matud pa sa biktima nga gihimo sa suspek ang iyang kaulag sulod mismo sa packaging area sa nasangpit nga establisamanto.
Sa pakighinabi sa Brigada News ngadto ni PO2 Elvie Lumantas sa Puerto police station niingon nga padayon pa nilang giimbestigahan ang maong kaso.
Si Lumantas niingon gihilam matod pa sa suspek ang pribadong parti sa lawas sa biktima sulod mismo sa kompaniya nga iyang gitrabahoan. FBD/ Rey Cabaraban

Kawatan mi-ataki sud sa bar

MOKABAT sa singko mil pesos nga salaping cash ang malamposong gikawat sa wala pa mailhing suspetsado gikan sa usa ka lalaki samtang anaa kini sulod sa usa ka bar barangay Puerto ning siyudad sa Cagayan de Oro.
Gi-asoy ni PO3 Allan Cajerel sa police station 6 (PS6) sa Puerto sa pakighinabi sa Brigada News nga mga alas 3:00 ang takna sa kaadlawon gahapon nagpatabang kanila ang biktima.
Si Cajerel nag-ila sa biktima nga mao si Ramon Borias, hingkod ang edad sa Promise Land, Tagoloan, Misamis Oriental.
Sa inisyal nga imbestigasyon sa kapolisan nasayran nga nakig-inom sulod sa Justine Bar ang biktima kauban ang iyang mga higala dihang gikuot ang iyang pitaka nga dunay sulod kwarta ug uban pang importanting mga dokumento.
Sa pagkakaron padayon pang giila sa mga awtoridad ang suspetsado human kini mikagiw sa wala pa matinong dapit. FBD

‘Killer’ nga anak gikasohan na

GIKASOHAN na og parricide ug frustrated homicide ang usa ka anak nga mi-unay pagpatay sa iyang amahan didto sa lungsod sa El Salvador, Misamis Oriental.
Sa gihimong pakighinabi sa Brigada News ngadto ni PO1 Joel Ugat sa El Salvador Muncipal Police Station niingon nga niadtong Lunes gipaslak na sa Bureau of Jail and Management Penology (BJMP) ang suspetsado nga si Jury Dandasan, 22, ulitawo Kalabaylabay, El Salvador, Misamis Oriental.
Matod ni Ugat, nagpabilin pa usab sa balay tambalanan ang ig-agaw sa suspek nga iya usab gitigbas atol sa kasaulogan sa iyang adlaw nga natawhan sa miaging Huwebes, Agosto 6.
Kahinumdoman si Senior Inspector Willie Bonga Rabuya, ang hepe sa kapolisan nga nahinabi sa Brigada News nag-ila sa namatay nga mao si Rogelio Dandasan, 50, minyo sa susamang dapit.
Sa imbestigasyon sa kapolisan, gi-asoy ni Rabuya, nga sa wala pa mahitabo ang krimen nagsadya pa ang pamilya ug adunay nahitabong inom tungod sa kasaulogan sa suspetsado sa iyang adlaw nga natawhan.
Tuod man unang gitigbas sa suspetsado ang kaugalingon niyang ig-agaw ug nakita kini sa iyang amahan.
Gibadlong sa amahan ang anak nga undangon na ang pagpanakit ngadto sa iyang ig-agaw, apan nasuko kini ug iyang gilakip pagtigbas ang iyang amahan.
Matod pang Rabuya, nagtinibasay gayud ang mag-amahan nga miresulta sa pagkamatay sa usa kanila.
Patay on the spot ang amahan human makaangkon og samad tinigbasan sa ulo ug dughan samtang ang ig-agaw nga si Curpos gidala sa balay tambalanan. FBD

Expensive dinner gisaway

GISAWAY sa duha ka partylist representatives nga mibisita dinhi sa dakbayan sa Heneral Santos ang nanghinobrang gasto sa dinner nga gipahigayo ni Pangulong Gloria Arroyo ug mga kaubanan didto sa Amerika sa miaging semana.
Matud ni Teddy Casiño sa grupong BayanMuna nga nagpakita kini sa pagkagarboso nga nasukwahi sa angayang himuon tungod sa estado sa Pilipinas nga naglisod ang kadaghanan.
Matud pa ni Casiño nga makunsiderang usa ka impeachable offence ang gihimo sa pangulo nga angayan niining ipaklaro.
Buot usab sa nahisgutang partylist representative nga tubagon sa mga kongresista ug mga opisyal sa gobyerno nga nakapil sa maong dinner.
Susamang gisaway ni Satur Ocampo sa grupong Bayan Muna ang pipila ka partylist representative nga nikuyog sa delegasyon sa pangulo sa Amerika.
Sobra matud pa ka galante kong tinuod nga si Congressman Romualdez ang mibayad sa kapin milyon ka pesos nga gastos sa panihapon sa presidente. Joe Reyes

Kagubot sa MILF ug militar mikalma

MIKALMA na ang pagsinukliay og mga bala tali sa mga sundalo ug grupong Moro Islamic Liberation Fron t(MILF) sa pipila ka bahin sa Mindanao.
Kini ang gibutyag ni Presidential Adviser for Mindanao Affairs Secretary Jesus G. Dureza tungod na usab sa pagpatuman sa suspension of military operation (SOMO) sa rehiyon sa Mindanao.
Gidugang pa niini nga ang peace and order sa Mindanao ang under control tungod sa SOMO nga nahimong dalan alang sa pagpromotar sa paborableng sitwasyon alang sa paghisgot sa kalinaw.
Gibutyag ni Dureza nga desidido ang gobyerno nga maduso ang peace process tali sa MILF.
“The SOMO was a way of the government to give attention to the plight of some internally displaced persons (IDPs) or the so-called "bakwit", in conflict-affected areas in Mindanao found to have been living under desolate condition,” matud ni Dureza.
Dugang usab niini nga ang MILF nagpatuman usab sa ilang suspension of military operations. Ning bulana sugdan na ang peace talks didto sa Kuala Lumpur, Malaysia. Joe Reyes

Publiko gi-aghat mosalmot sa ‘Doble Kara’ sa piyesta

GI-AGHAT karon ni Kapitan Basilio ‘Ely’ Labino sa Barangay 39 ning siyudad sa Cagayan de Oro ang publiko nga mosalmot sa ipahigayong ‘Doble Kara’ competition alayon sa nagsingabot nga kapiyestahan ni Senior San Agustin karong Agosto 24-25, ning tuiga.
Sa gihimong pakighinabi sa Brigada News ngadto sa opisyal gi-asoy niini nga adunay dakong ganti nga madawat ang mananaog sa maong pasundayag.
Si Labino niingon himoon ang nasampit nga pasundayag sa mga alas 6:00 ang takna sa gabii sa petsa 25 sa Agosto.
Subay niini nanghinaot ang opisyal nga magmalamposon ang maong aktibidad diin usa gikahinamang kalihokan sa ilang barangay alayon usab sa kapiyestahan ning siyudad.
“Daghan pud ta mga activities nga himoon. Natunong man gud ni siya sa kapiyestahan usab sa atong siyudad,” pamahayag ni Labino.
Gawas sa doble kara aduna usab sports fest nga himoon ang nasampit nga barangay.
“Aduna tay himoon usab nga basketball aron malingaw sab ang atong nga kabataan,” asoy ni Labino.
Subay niini gisiguro usab sa kapitan ang seguridad sa nasampit nga barangay.
“Aduna tay mga 19 ka barangay polis, atong sigurohon ang seguridad,” matod niya.
Gani nagpadangat usab si Labino sa iyang pasalamat ngadto sa mga residente sa barangay 39 sa pagpabilin niing malinawon ug walay dagkong mga krimen nga nahitabo. FBD

Pagpa-lisensya’g armas gisugdan sa kabarangayan

NAGPADAYON karon ang gilusad nga ‘Barangay Visiting’ sa kapolisan sa matag barangay ning siyudad alayon sa firearms amnesty program sa Philippine National Police (PNP).
Si acting city police director PSSupt. Noel Armilla sa Cagayan de Oro City Police Office (Cocpo) nga nahinabi sa Brigada News naglaom nga mopartisipar ang tanang naghupot og armas aron dili usab sila maglisod sa pagkuha og lisenya niini.
Si Armilla niingon nga tumong sa maong lakang ang pagsiguro nga mahatgan tanan og lisensya ang tanang mga gihuptang armas sa publiko.
Sa gihimong pakighinabi sa Brigada News ngadto ni Chief Inspector Jeffrey Lawrence Mauricio, ang hepe sa police atation 6 (PS6) sa Puerto ning siyudad niingon nga maayo kaayo ang nahisgotang programa aron maagni usab ang mga adunay armas nga mokuha og lisensiya gumikan dali lamang ang proseso.
Si Mauricio niingon nga bentaha usab alang sa dunay mga pusil ang maong lakang sanglit dili kaayo tantong mahal ang galastuhon sa pagkuha og lisensya.
Gani gibutyag niini ang mga mosunod nga magastos alang sa pagkuha og lisensya sama sa:
A. Unrenewed/Expired license
- License Card-------- P150.00
- Admin Fee-----------P500.00
B. Unregistered/ New
- License Card----------P150.00
- Admin Fee-------------P500.00
- Ballistic-----------------P350.00

Dugang asoy sa opisya nga ang mga rekisitos alang sa pagkuha og lisensiya sa armas mao lamang ang proof of identification (sama sa birth certificate, cedula, marriage contract, valid identification card, etc..), Barangay Clearance, Police Clearance ug ang armas nga kuhaan og lisensiya ug pwede na usab ang hulagway lamang sa armas.
Ang Barangay Visiting alang sa ‘Firearms Amnesty Program’ sa PNP kutob lamang sa Oktubre 31 ning tuiga. Mel B. Munsad

P430 M nga tabang gihatag sa Mindanao

KORONADAL CITY – Subling makadawat og hinabang pinansyal ang Mindanao gikan sa ubang kanasuran partikular sa Europian Commission.
Gibutyag nga kapin sa P430 M ang tabang alang sa food security sa Mindanao.
Kini na ang ikaduha sa tulo ka pasalig nga financial assistance sa EC alang sa Pilipinas ilawom sa food facility nga kinatibuk-ang 30 ka milyon ka euro.
Ipatuman ang nahisgutang hinabang pinaagi sa United Nations World Food Programme (WFP) sa pakig-alayon sa Department of Social Welfare and Development (DSWD) ug Departement of Agriculture (DA) ug mga Local Government Units (LGU's) sa lima ka mga probinsya nga gilangkuban sa Maguindanao, North Cotabato, Sultan Kudarat, Lanao del Norte ug Lanao del Sur.
Nag-unang benepisyaryo sa nasangpit nga hinabang ang mga residente sa 5 ka probinsya nga apektado sa kalamidad, kagubot ug giyera.
Gilauman nga pinaagi sa maong hinabang mapalambo usab ang food production sa nasangpit nga mga dapit kong asa daghan ang naglisod sa ilang pagkaon tungod sa mga kagubot ug kalamidad. Joe Reyes

Konsultasyon sa pag-amyenda sa Motorela ordinance, ipahigayon

ILIGAN CITY- Mipatawag si City Councilor Providencio “Boy” Abragan, Sr. og usa ka public hearing kalabot sa gisugyot karon nga amendahan ang City Ordinance No. 3346, series of 1998 o ang balaod nga nag-regulate sa operasyon sa mga motorela cargoes.
Ipahigayon kini ugmang adlawa, Agosto 13, alas dos ang takna sa hapon, didto sa Session Hall sa Sangguniang Panlungsod.
Gidapit nga motambong niini ang mga motorela operators sa siyudad ug ubang buhatan ug organisasyon nga adunay kalambigitan sa maong panginabuhi-an o patigayon.
Parehong gihuptan ni Konsehal Abragan ang chairmanship sa mga Komitiba sa Prangkisa ug Transportasyon sa hawanan sa konseho sa siyudad. Mta

Brigada News August 10

‘Priso’ gidid-an sa kapuyo mag-sex naghikog

NAGHIKOG ang usa ka bilanggo didto sa Agusan del Norte Provincial Jail human kini gidid-an sa iyang kapuyo nga makighilawas ngadto kaniya sulod sa conjugal room sa maong prisohan sa miaging adlaw.
Subay sa report, giila ang nasampit nga priso nga mao si Christopher Asuete, hingkod ang edad, dunay kapuyo didto sa lalawigan sa Agusan del Norte.
Nahitabo ang insidente dihang miduaw sa prisohan ang kapuyo ni Asuete nga giilang si Evelyn Longaquet, hingkod ang edad sa susamang ra usab nga dapit.
Tuod man naghinam-hinam kuno niadtong higayona si Asuete nga makighilawas sa iyang kapuyo dihang gihatagan sila og higayon sa jail warden sulod sa conjugal room.
Si Asuete nihangyo gayud ngadto sa iyang kapuyo nga makighilawas tungod dugay na usab silang wala mag-uban sa usa ka lawak, apan nagdumili ang babaye nga miresulta sa paghurimintado niini.
Taliwala sa nahitabong komprontasyon, nakit-an ni Asuete ang samin sulod sa conjugal room ug iya kining gibundak hangtod nga nabuak.
Gikuha matod pa ni Asuete ang hait nga buak sa samin ug iya kining giduslak ang iyang kaugalingon.
Dihang nakit-an sa babaye nga nagkadugo na ang iyang kapuyo gilayon kining nagpatabang sa mga awtoridad ug ilang gidala sa bay tambalanan si Asuete.
Gibutyag nga buot hunuson ni Asuete ang iyang kaugalingon tungod sa iyang nahuna-hunaan nga daw nawad-an na og gana kaniya ang iyang kapuyo.
Gidala si Asuete sa opistal nga nagkadugo samtang igo na lamang naghilak ang iyang kapuyo dungan sa pagpangayo og pasaylo.
Sa pagkakaron padayon pang gitambalan sa lokal nga ospital ang nasampit nga priso. Fred Dellava

Comelec: Mga botante nidaghan

GIPANGANDAMAN na karon sa commission on election (Comelec) ning siyudad sa Cagayan de Oro ang nagsingabot nga piliay sa 2010.
Gibutyag ni Comelec Officer Atty. Stalen Baguio nga ilang nang gisugdan ang pagbansay sa mga kahimanan nga gamiton alang sa computerized elections.
Gani gitino sa opisyal nga nadugangan ang listahan sa bag-ong mga botante karong 2010 dinhi sa siyudad 60 ka mga barangay.
Subling gi-aghat sa opisyal ang publiko nga wala pa makaprehistro nga magparehistro na ug dili na hulaton ang deadline sa buwan sa Oktubre tungod magpunsisok na usab niini bagang duot sa katawhan.
Nasayran una nang gihimong satellite office sa Comelec ang mga barangay ning siyudad aron masiguro nga maka-parehistro ang tanan ug dili na magdasok sa Comelec office.
Sa pikas bahin, gihingusgan sa Korte Suprema nga constitutional ang RA 9369 kon ang balaod nga nag-amyenda sa Election Modernization Act ilabina nga ang probisyon kalabot sa paghatag og gahom sa kongreso ug Commission on Elections alang sa paghimo og pre-proclamation sa presidential ug vice-presidential elections ingon man sa senatorial elections.
Subay sa ika-20 nga panid sa desisyon sa Korte Suprema, gibasura ang petisyon sa partylist group nga Barangay Association for National Advancement and Transparency (BANAT) nga buot pugngan ang Comelec sa pag-imposar sa maong balaod gumikan tungod unconstitutional kini. Fred Dellava

Pagpatukod og legislative building sugdan na

GISAAD karon ni Mayor Constantino Jaraula nga gahinan og igong pondo ang pagpatukod og legislative building ning siyudad sa Cagayan de Oro.
Matod sa alkalde, ang maong lakang kabahin sa iyang plano nga golden mile sulod sa iyang termino.
Si Jaraula niingon gawas sa nasampit nga gambalay, gipaningkamotan matod pa sa iyang administrasyon ang pagpatuman sa flood control sa Oro river.
Gani gi-asoy sa mayor nga hapit na kini mahatan og katumanan ug ila na lamang gihan-ay ang mga panginahanglanon aron sugdan na ang maong proyekto.
Nagtuo ang alkalde nga kong mahuman na ang legislative building, bentaha usab alang sa mga magbabalaod ning siyudad ang kahamogaway sa ilang pagkabutang.
Sa pikas bahin naglaom usab si Jaraula nga masugdan na ang redevelopment sa Ampi Theatre. Apan giangkon niini nga maglisod na ang kontraktor sa paghuman niini ayha ang kapiyestahan sa CDO sanglit apeke na sa panahon.
Nasayran una nang gipalambo ug gipanindot pa sa kagamhanang lokal ang Gaston Park ning siyudad diin wala una gipasudlan sa publiko. Fred Dellava

Lalaki gipatay sa kainom

USA ANG patay, samtang usa usab ang nagpabilin pa sa bay tambalanan human mahitabo ang dugoong panaglalis sa duha ka mga lalaki sa Palalan, Tablon ning siyudad sa Cagayan de Oro gahapon.
Si Po3 Pheody de Oro sa police station 10 (PS10) sa Cugman ning siyudad nga nahinabi sa Brigada News nag-ila sa namatay nga mao si Eric Narido, 26, minyo sa susamang dapit.
Sa imbestigasyon sa kapolisan, gi-asoy ni de Oro nga mga alas 12:30 ang takna sa kaadlawon natigbasan sa suspek ang biktima human wala magkasinabot sa gamay ra nga istorya.
“Pulos man gud ni sila naka-inom mao tong wala gyud magsinabtanay,” pamahayag niini.
Si de Oro nag-ila sa suspetsado nga mao si Dominggo Maratas, 34, minyo ug silingan ra usab sa biktima sa nasampit nga dapit.
Matod pa niya, patay diha-diha ang biktima human makaangkon og samad tinigbasan sa ulo, kamot ug likod nga bahin sa lawas, samtang ang suspek nakaangkon usab og samad pinusilan sa iyang agtang.
Subay sa imbestigasyon, dihang nagkabingkil na ang duha, nikuha og air gun si Narido ug iyang gipusil si Maratas.
Tuod man nasuko pag-ayo ug nasakitan gayud si Maratas hinungdan nga iyang gibalosan si Narido.
Nikuha usab og mahait nga sundang si Maratas ug iyang gitigbas si Narido.
“Grabe gyud ning ilang away duha, pag-abot namo sa crime scene daghan kaayo mga dugo,” dugtong ni de Oro.
Patay on the sport si Narido samtang gidala usab sa balay tambalanan sa Northern Mindanao Medical Center (NMMC) si Maratas.
“Pag-abot namo sa crime scene wala namo narekober ang air gun ug sundang,” matod ni de Oro.
Nasayran nag-inom niadtong higayona ang biktima ug ang suspek tungod adunay gipahigayong disco sa ilan dapit.
Dugang asoy ni de Oro gipa-ilalom sa operasyon si Maratas tungod sa samad pinusilan niini sa iyang agtang ug padayon pa usab giimbestigahan ang maong kaso.
Matod ni de Oro, sa higayon nga maulian na sa gibating kasakit si Maratas ila kining i-kostudiya ug posibleng mapakasakahan og kasong murder. Fred Dellava


Drayber nakalimot mag-brake, 5 patay


PADAYONG giimbestigahan sa mga awtoridad ang mangilngig nga insidente sa kadalanan didto sa dakbayan sa Butuan, Sabado sa gabii.
Subay sa report, pulos namatay ang mga sakay sa Mitsubishi pick up human kini magbangga sa nakaparadang Mitsubishi Elf truck sa Purok 4, Barangay Antongalon, ning siyudad sa Butuan.
Ang mga biktima gilangkoban sa upat ka mga referee nga pulos miyembro sa Basketball Association of the Philippines (BAP) Butuan City chapter ug ang drayber nila.
Giila ang mga namatay nga mao sila si Rodulfo Durado, Edilberto Lagnada, Rolando Altar ug Allan Hinayon, kinsa pulos miyembro sa BAP.
Sumal sa inisyal nga imbestigasyon sa kapolisan, gikan ang nasampit nga mga referee sa Brgy. Taligaman nga nag-officiate og basketball game sa usa ka liga.
Dihang pauli na kuno ang mga nahisgotan, kalit lang nibangga ang ilang gisakyan ngadto sa dakong trak sa daplin sa national highway.
Tuod man, patay on the spot ang wala pa mailhing drayber samtang gidala sa balay tambalanan ang upat ka mga referee apan gideklarar nga dead-on-arrival sa attending physician.
Miggula sa imbestigasyron nga lango sa ilimnong makahubog ang drayber sa upat ka mga referee niadtong higayona hinungdan sa aksidente. Fred Dellava

Kawatan apil nag-vigil

HUGTANONG gipanghimakak sa usa ka bayot ang alegasyon batok kaniya nga siya ang responsabli sa pagkawat og cellphone sa usa ka lalaki samtang nag-vigil sa minatay sa Punta, Macabalan ning siyudad sa Cagayan de Oro.
Subay sa report sa police station 5 (PS5) sa Macabalan ning siyudad, giila ni PO1 Christopher Pagapolaan ang biktima nga mao si Elesio Panillon, 19, ulitawo sa susamang dapit.
Si Pagapolaan nga nahinabi sa Brigada News niingon nga mga alas 3:30 ang takna sa kaadlawon gahapon midangop sa ilang istasyon ang biktima.
“Nakatulog man kuno kining biktima kay nag-vigil lagi. Wala niya mabantayi ang iyang cellphone,” pamahayag pa niini.
Dugtong ni Pagapolaan adunay nakakita nga usa ka bayot ang nikuot ug nikuha sa cellphone sa biktima nga Nokia 1112 nga nagkantidad og P1, 900.00
Miresponde diha-diha ang kapolisan ug gidakop ang suspek nga giilang si Oliver Villamor, 36, ulitawo sa Piaping Itum, Macabalan ning siyudad.
Si Pagapolaan nagkompirmar nga nalambigit usab kaniadto sa kasong pagpangawat ang suspetsado.
“Aduna may nakakita, nga siya gyud ang nagkuha,” matod niya.
Sa pagkakaron anaa sa kostudiya sa kapolisan ang suspetsado, ug gitakdang pasakahan og pormal nga sumbong, kini kong mapamatud-ang sal-an. FBD

Kawatan og metrohan gi-surveillance

GIHIMOAN na og dugang pagpanubay sa mga operatiba sa police station 4 (PS4) sa Carmen ang sunud-sunod nga kawat sa mga metrohan sa tubig ning siyudad sa Cagayan de Oro.
Sa gihimong pakighinabi sa Brigada News ngadto ni PO2 Jason Landar sa PS4, gi-asoy niini nga mihimo na og surveillance ang ilang mga operatiba batok sa mga suspetsado.
Nasayran usa ka biktima na usab ang midangop gahapon sa buntag sa kapolisan human wala mi-agas ang ilang gripo tungod gikawat ang ilang metrohan nga gipanag-iyahan sa Cagayan de Oro Water District (COWD).
Si Cesar Mercado, 53, minyo sa Mercado Compound sa Vamenta Blvd., Carmen niingon nga mga alas 6:00 ang takna sa buntag na lamang niining nadiskubrehan nga nawala na ang metrohan.
Matod niya, posibleng sa gabii mi-ataki ang mga kawatan aron dili sila makabantay.
Dugang niya ang maong metrohan naka-rehistro sa iyang anak nga nagtrabaho didto sa Sugbu.
“Padayon pang giila sa atong mga operatiba kining mga responsabli sa pagpangawat og metrohan,” pamahayag ni Landar.
Kahinumdoman sa miaging adlaw usa ka caretaker sa apartment ang midangop sa kapolisan human mawala ang ilang upat ka water meter. FBD

2 ka ulitawo giluba og botelya

SAMAD sa dughan, liok ug kilid sa lawas ang naangkon sa usa ka ulitawo nga giluba og buak nga botelya sa bino sa Hilltop Upper Carmen ning siyudad sa Cagayan de Oro.
Si PO2 Jason Landar sa police station 4 (PS4) sa Carmen nga nahinabi sa Brigada News niingon nga duha ka mga biktima ang gipangluba sa suspetsado nga lango sa ilimnong makahubog.
Giingong pulos naka-inom ang mga biktima ug ang suspetsado hinungdan nga nagkabingkil ug wala nagkasinabtanay Sabado sa gabii.
Si Landar nag-ila sa mga biktima nga mao sila si Danny Rodrigo, 26, ulitawo ug Teofilo Gamuro, 31, ulitawo sa susamang dapit.
Si Gamuro nakaangkon og samad sa iyang agtang human maposposan og botelya sa red horse.
Sa inisyal nga imbestigasyon sa kapolisan, ang mga biktima nag-ila sa suspetsado nga mao si Gary Zari, 29, minyo sa Zone 6, Bayabas, ning siyudad.
Hinoon mirespondi gilayon ang kapolisan sa crime scene hinungdan sa pagkasikop sa suspetsado.
Dugtong ni Landar nagtingkagol na sa Maharlika Detention Cell ang suspetsado. FBD

Tindahan giransak

GIRANSAK sa wala pa mailhing mga suspetsado ang usa ka dakong tindahan sa mga cellphone sa kilid sa Ororama Mega Center ning siyudad sa Cagayan de Oro sa miaging gabii.
Si PO3 Jigger Rojo sa police station 3 (PS3) sa Agora nga nahinabi sa Brigada News nag-ila sa tag-iya sa maong tindahan nga mao si Ema Ruth Adap, 33, minyo sa RER Subdivision ning siyudad.
Matod pang Rojo nagpatabang kanila ang biktima human madiskubre niini nga nahanaw na ang iyang mga cellphone accessories diin gibana-banang mobalor sa 3 mil pesos.
Gi-asoy sa biktima nga igo na lamang niyang nasayran ang insidente mga alas 9:30 ang takna sa buntag dihang iyang nakit-an nga nagkatag na ang iyang mga gibaligya.
Si Rojo nagdugang nga gihimoan na og dugang pagpanubay sa kapolisan ang nasampit nga panghitabo. Mel B. Munsad

Baha sa Mindanao, kapin P1B ang damyos

MILAMPAS na sa usa ka bilyon ka pesos ang damyos sa imprastraktura ug agrikultura tungod sa pagbaha sa Mindanao sukad niadtong Hulyo.
Kini ang gibutyag sa National Disaster Coordinating Council o NDCC. Sa ulahing report sa NDCC niadtong biyernes ang damyos sa pagbaha mikabat na sa P1.11 B. Ang Cotabato province ang nakaangkon sa dakong damyos nga mokabat sa P124 M sa imprastraktura ug P800 M sa agrikultura.
Matud sa NDCC nga ang damyos sa infrastructure sa South Cotabato, Cotabato province, Cotabato City, Sarangani, Maguindanao ug Sultan Kudarat province ang mokabat tanan sa P 292.07 M.
Samtang ang damyos sa agrikultura sa mga naasuyng probinsya ang mokabat usab sa P826.557 million. Nagpabiling 20 ang namatay lakip ang unom gikan sa Sarangani Province, duha sa North Cotabato, 11 gikan sa Maguindanao, usa gikan sa South Cotabato, ug duha gikan sa Cotabato City .
Kapin usab sa 106,409 ka pamilya kon 504,254 ka tawo gikan sa 361 ka barangay sa 46 ka lungsod sa siyam ka probinsya ang apektado. Joe Reyes

22 ka apektado sa buhawi, hataga’g relokasyon

DAVAO CITY- Gi-andam na sa provincial government ang relocation alang sa mga biktima sa buhawi sa duha ka barangay sa lungsod sa Poblacion, Magsaysay, Davao del Sur.
Nasayran nga baynte dos ka pamilya ang apektado sa nasangpit nga buhawi.
Matud pa kang Governor Douglas Cagas, nakapalit ang lokal nga panggamhanan og luna sa Poblacion Magsaysay aron himuong relocation sa mga residente nga apektado sa nagkadaiyang mga kalamidad.
Apan gitino sa gobernador nga dili nila mahimong pugson ang mga residente nga mobalibad sa tanyag sa provincial government. Giapud -apuran na usab og tabang sa Department of Social Welfare and Development ang mga apektadong pamilya susama sa pagkaon ug uban pa.
Una nang gikumpirma ni Magsaysay Mayor Jess Lumanog ,nga gumikan sa kusog nga hangin nga giubanan sa kusog nga pag-ulan hinungdan nga naguba ang panimalay sa mga residente sa Barangay Poblacion ug Barangay New Locos.
Upat ka poste sa kuryente ang nadaut hinungdan nga napalong usab ang kutay sa kuryente sa maong dapit.
Usa ang samdan sa maong insedente nga nakaangkon og samad sa iyang lawas human natumbahan og punuan sa lubi ang ilang balay. Joe Reyes

“Batang Himsog” project gisuportahan sa PNP 12

GENERAL SANTOS CITY- Gisuportahan sa Police Regional Office 12 ang Mindanao Extension sa “Tambayayong Gensan: Batang Himsog” Project, nga anaa na karon sa ikaduha ka tuig nga implementasyon.
Nasayran nga tumong niini nga masuportahan ang sobra baynte otso ka mga public school elementary shools.
Sukad nga gisugdan ang “Tambayayong Gensan: Batang Himsog” Project milambo sa otsentay singko ka porsento sa mil tres sientos baynte tres ka malnourished grade 1 ug grade 2 pupils gikan sa dise nuebe ka mga public elementary schools sa Mindanao aron makaangkon og normal nutrition status.
Natabangan sa maong proyekto sa suporta sa nagkadaiyang stakeholders, ang baynte dos ka porsento sa kapin sais mil ka mga grade 1 ug grade 2 pupils kon nuebe punto siete ka prosento sa kapin kinse mil ka mga malnourished nga pupils gikan grade 1 hangtud grade 6.
Ang paglusad sa maong proyekto sa Banisil Elementary School ang gisuportahan sa PRO 12, local government unit sa General Santos, nagkadaiyang NGO, Department of Education region 12 ug uban pang government agencies, professional groups, academe, civic organizations ug uban pang corporate companies. Joe Reyes

NPA sa Sarangani nagkahuyang

SARANGANI PROVINCE- Nagkahuyang na ang grupo sa New Peoples Army sa Sarangani Province ilabina sa Front Committee 71 sa Far South Mindanao.
Kini ang gikabutyag ni Colonel Leo Crescente Ferrer, commanding officer sa Joint Task Force human usab sa sunod sunod nga pagsurender sa mga miyembro sa NPA sa militar.
Ulahing misurender si Gaga Londong alyas Ka Blakson, 26- anyos nga nagpuyo sa Sapu Masla, Malapatan, Sarangani Province.
Lakip gisurender ni Ka Blakson ang usa ka punto 38 rebolber ug mga bala.
Samtang misurender usab sa 73rd IB niadtong miaging mierkules ang usa ka NPA member nga nailhang si Dante Tiwado nga taga Alabel, Sarangani Province.
Ang duha ka NPA member ang ipresenta sa lunes kang Sarangani Governor Miguel Rene Dominguez. Joe Reyes


Amahan gireklamo’g child abuse

GIREKLAMO ang usa ka amahan ngadto sa kapolisan human matod pa kini nanakit sa kaugalingon niyang anak.
Sa report sa police station 3 (PS3) sa Agora ning siyudad, gi-asoy ni PO3 Jigger Rojo nga gireklamo ang usa ka Julito Flores, hingkod ang edad sa Barangay Lapasan ning siyudad.
Matod ni Rojo gi-alegar ang nasampit nga amahan nga nanakit sa duha niini ka mga anak nga babaye kinsa pulos mga menor de edad.
Si Rojo nga nahinabi sa Brigada News niingon nga personal mismo midangop sa ilang buhatan ang niadtong miaging Sabado, Agosto 8 ang 17 anyos ug 14 anyos nga dalagita..
Gisaysay sa duha ka mga dalagita nga kalit lamang silang gipasakitan sa ilang amahan sa walay igong hinungdan.
Asoy pa nila ngadto sa kapolisan nga gitamparos matod pa sila sa ilang amahan ug gisumbag pa gayud ang ilang mga ulo.
Tuod man nakaangkon ang duha ka mga dalagita og nagkadaiyang bun-og sa ilang kalawasan.
Hinoon gidugang pa ni Rojo nga padayon pang giimbestigahan sa sa women’s desk sa PS3 ang maong kaso.
Matod niya kong mapamatud-ang sal-an ang nasampit nga amahan mahimo kining pasakahan og kasong paglapas sa R.A 9262 kon Violence against Women and Children’s act. Mel B. Munsad

Wanted person nasignit

USA KA wanted person ang malamposong nasikop sa mga awtoridad sa Barangay Lapasan ning siyudad sa Cagayan de Oro gahapon.
Subay sa report sa kapolisan dugay nang gipangita ang suspek gumikan sa kaso niining frustrated homicide.
Gani nasikop ang suspetsado nga giilang usa ka Roger Lopez, hingkod ang edad, minyo, lumad nga taga Magkarila, Talisayan, Misamis Oriental.
Gibutyag nga usa ka PO2 Bobby Lopez sa Talisayan Municipal Police Station ang nakig-alayon sa kapolisan sa police station 3 (PS3) sa Agoda ning siyudad aron sa pagsikop sa suspek.
Gidakop ang suspetsado pinasikad sa warrant of arrest nga gilagdaan ni Hon. Judge Dan R. Calderon sa Regional Trial Court (RTC 10 Judicial Region, Branch 26 sa Medina Misamis Oriental).
Matod sa korte ang suspetsado adunay kasong frustrated homicide diin nahitabo pa niadtong tuig 2005 ug adunay girekomendang piyansa nga mobalor sa 24 mil pesos alang sa temporaryo niining kagawasan.
Nasayran pasado alas nuebe sa buntag gahapon nasikop sa hiniusang pwersa sa kapolisan ang suspetado.
Sa pagkakaron ang suspek anaa sa kostudiya sa Talisayan Municipal Police Station.Mel B. Munsad

Motor giparking sa mall, gikarnap

USA ka brand new Honda XRM-125 nga motorsiklo ang gituohang gikarnap sa wala pa mailhing suspetsado samtang kini giparada sa drayber gawas sa mall ning siyudad sa Cagayan de Oro gahapon.
Subay sa report, mga alas 2:00 ang takna sa hapon gipa-flash alarm ang ubang mga presinto sa kapolisan human mawala ang motor nga dunay plaka KE 6642.
Si PO2 Rodrigo Reyes, imbestigador sa police station 3 (PS3) sa Agora nga nahinabi sa Brigada News niingon nga igo na lamang nadiskubrehan sa tag-iya nga nawala na ang iyang motorsiklo dihang paggawas na niini sa Gaisano Mall sa CM Recto ning siyudad.
Matod ni Reyes gipanag-iyahan sa usa ka Marilou Bernalte, 46, minyo sa Poblacion Sugbongcogon, Misamis Oriental ang maong sakyanan.
Hangtod sa pagsulat ning balita wala pa nakit-an ang nasampit nga sakyanan ug padayon pang gipangita sa mga awtoridad. Mel B. Munsad

2 ka tulisan sakpan

NAGTINGKAGOL na sa lock up cell sa police station 3 (PS3) sa Agora ning siyudad sa Cagayan de Oro ang duha ka mga tulisan kinsa nasikop sa kapolisan gahapon.
Giingong suspek ang duha ka mga lalaki sa pagpanulis sa usa ka de pasaherong dyip sa may dalang C.M Recto ning siyudad mga alas 12:00 ang takna sa udto.
Subay sa report sa kapolisan giila ang mga dinakpan nga mao sila si Danilo Pontevilla, 20, ug Jef Yabut, 21, pulos ulitawo ug molupyo sa Barangay Macabalan ning siyudad.
Gibutyag sa mga awtoridad nga gisulayan pagtulis sa mga suspek ang drayber sa Bulua Liner nga si Jovanni Lamaglamag apan wala sila nagmalamposon tungod misukol ang biktima.
Nasayran nga nasikop ang duha ka mga suspek uban sa tabang sa mga barangay tanod sa Barangay 26 ning dakbayan.
Nakuha gikan sa posesyon sa mga dinakpan ang mahait nga butang diin gituohang maoy gigamit sa pagpanulis.
Ning adlawa gitakdang pasakahan og kaso ang mga suspetsado. Mel B. Munsad

Ospital gitulis, inside job?

NAKURAT na lamang ang pipila ka mga trabahante sa balay tambalanan nga Northern Mindanao Medical Center (NMMC) human kini giransak sa wala pa mailhing mga suspetsado gahapon.
Sa report sa kapolisan nasayran nga mga ala 1:00 ang takna sa hapon kapin kon kulang giransak ang Supply section room sa maong ospital.
Sa inisyal nga imbestigasyon sa kapolisan adunay nakit-ang forcible entry sama sa pagbuak sa samin sa bintana aron makasulod ang mga suspek.
Sa gihimong pakighinabi sa Brigada News ngadto ni Ma. Lorena Moneva, Admin Assistant III sa Supply Section sa NMMC niingon nga nagkatag na ang mga gamit dihang iyang nakit-an.
Gani wala pa nila masayran kong unsa nga mga gamit ang gilungkab sa mga responsabli.
Gituohan nga usa ang laptop computer nga gipanag-iyahan ni Moneva ang gikuha sa mga tulisan.
Hinoon dugtong ni Moneva nga gawas sa ubang mga butang nga naa sulod sa maong buhatan wala mahilabti ang sapi nga anaa sulod sa locker.
Padayon pa usab giimbestigahan sa kapolisan ang maong kaso. Usa sa motibo nga gitun-an mao ang inside job. Mel B. Munsad